کوئٹہ (نمائندہ خصوصی) – بلوچستان میں کل بروز بدھ موبائل فون سروس اور موبائل ڈیٹا سروس عارضی طور پر معطل رہنے کا امکان ہے۔ ذرائع کے مطابق سروس کی معطلی کے حوالے سے متعلقہ اداروں کی جانب سے انتظامات کیے گئے ہیں۔
ذرائع کے مطابق 12 ربیع الاول کے موقع پر صوبے بھر میں سیکیورٹی انتظامات کے پیش نظر موبائل سروسز کو عارضی طور پر بند کرنے کا فیصلہ کیا جا سکتا ہے۔ اس سے قبل بھی مذہبی مواقع اور حساس ترین تقریبات پر موبائل سروسز کو معطل کیا جا چکا ہے تاکہ کسی بھی ناخوشگوار واقعے کو روکا جا سکے۔
عہدیداروں کے مطابق کل سہ پہر سے موبائل فون سروس بند کرنے کا فیصلہ کیا گیا ہے جب کہ انٹرنیٹ سروس بھی بند رہے گی، البتہ فکسڈ لائن اور وائی فائی سروس کو برقرار رکھنے کا امکان ہے۔
موبائل ڈیٹا بند رہنے کی صورت میں پاکٹ نیٹ اور موبائل انٹرنیٹ استعمال نہیں ہو سکے گا جس سے ڈیجیٹل کاروبار اور سوشل میڈیا متاثر ہوں گے۔ عوام کو مشورہ دیا گیا ہے کہ ضروری ڈیٹا پہلے سے ڈاؤن لوڈ کر لیں اور Wi-Fi جیسے متبادل ذرائع استعمال کریں۔
انسانی حقوق کی تنظیموں نے تحفظات کا اظہار کرتے ہوئے کہا ہے کہ انٹرنیٹ بندش سے ڈیجیٹل معیشت اور عوام کو بھاری نقصان پہنچ سکتا ہے۔ تاہم انتظامیہ کا کہنا ہے کہ یہ اقدام عوامی تحفظ کے لیے اٹھایا گیا ہے اور اس کی مدت محدود ہوگی۔
تبصرے لوڈ ہو رہے ہیں…