کوئٹہ (آئی ایس پی آر) – چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کوئٹہ گیریژن کا دورہ کیا، جہاں انہوں نے فیلڈ فارمیشنز کے کمانڈرز اور کمانڈنگ افسران سے ملاقات کی اور صوبے کی سیکیورٹی صورتحال کا جائزہ لیا۔ اس موقع پر کور کمانڈر کوئٹہ لیفٹیننٹ جنرل فیصل نصیر آرمی چیف کے ہمراہ فرنٹ سیٹ پر موجود تھے۔ آئی ایس پی آر نے اس حوالے سے خصوصی تصویر بھی جاری کی ہے۔
دورے کے دوران فیلڈ مارشل عاصم منیر کو بلوچستان میں جاری سیکیورٹی صورتحال، آپریشنل تیاریوں اور امن و استحکام کے لیے کیے جانے والے اقدامات پر جامع بریفنگ دی گئی۔ بریفنگ میں ادارہ جاتی ہم آہنگی اور صوبے کی سماجی و اقتصادی ترقی کے لیے تعاون کے امور کا بھی جائزہ لیا گیا۔
فیلڈ مارشل عاصم منیر نے افسران اور دستوں کے اعلیٰ پیشہ ورانہ معیارات، آپریشنل تیاری اور بے مثال لگن کو سراہا۔ انہوں نے امن کو مضبوط کرنے اور پائیدار اقتصادی سرگرمیوں کے لیے سازگار ماحول برقرار رکھنے کے لیے قانون نافذ کرنے والے اداروں اور دیگر ریاستی اداروں کے درمیان مسلسل ہم آہنگی کی اہمیت پر زور دیا۔
آرمی چیف نے اس عزم کا اعادہ کیا کہ بلوچستان کے عوام کا امن، خوشحالی اور فلاح و بہبود ریاستی کوششوں کا مرکز ہے۔ انہوں نے کہا کہ ایک مستحکم اور محفوظ ماحول صوبے کے عوام کے لیے ترقیاتی منصوبوں، معاشی مواقع اور بہتر امکانات کو آسان بناتا رہے گا۔
فیلڈ مارشل عاصم منیر نے شہداء کی قربانیوں کو خراج عقیدت پیش کیا اور فرائض کی انجام دہی میں افسران اور دستوں کی پختہ لگن کو سراہا۔
تبصرے لوڈ ہو رہے ہیں…